Vereins-Gschicht

Millennium 2000, dr Grundstei vomene neue Joortuusig und dr Grundstei vo dr Guggemusig Revoluzzer. Mit numme 12 Lüt sind mir unter em Name "D´Revoluzzer" s erste Mol an dr Fasnacht 2000 uf dr Hauptstroos am Aescher Umzug uf de Bei gsi. Zwar sind mir dr Umzug nonig musizierend maschiert, defür hän mir am Obe i de Beize mit unsere Instrument für usglasseni Stimmig gsorgt.

 

Mir hän als neui Gugge vo Aesch sehr schnell neui Mitglieder gfunde und so hän mir im Joor 2001 mit  16 aktive Mitglieder dr Umzug in Aesch musikalisch und miteme eigene Kostüm, emene Stier, chönne begleite.

So sind d`Joore vergange und es hed einigi Wächsel gäh unter de Mitglieder. Nochdäm mir an dr Fasnacht als Dracula, Pirat und als Mexicaner gloffe sind, hän mir im Joor 2010 unser 10 Joor-Jubiläum gfiirt. Miteme grosse Fescht, dr "Revoluzzion" hän mir und anderi Gugge d Löhrenagger-Halle in Aesch zum Tobe brocht.

Mit de Joore isch au s musikalische Niveau gstiige und unser Liederrepertoire het sich immer wieder gwandlet. Noch es paar Hungerjoor, was Mitglieder betrifft, hämmer uns neu "erfunde", unseri Logos aktualisiert und sind de Umzug au mit 12 Lüt no gloffe. 

 

20 Joor noch de Gründig chönne mir stolz zruggluege uf unseri Leistige und die tolle Kostüm, wo mir scho alli gha hän. Sig au DU drbi und gstalt unseri Zuekunft mit dim musikalische Talent und dim hammer Charakter mit :)